Gure senide eta lagun gazteak independentistak dira. Hori da polizia eta guardia zibilak atxiki eta inkomunikaturik edukitzeko arrazoi bakarra.

Gure senide gazteak independentistak dira. Independentziaren aldeko pentsamendua gazteen artean zabaltzea, independentziaren aldeko proiektuak sortzea eta etorkizun aske batekin amesteaz gain, horren alde lan sozial eta politikoa egitea da polizia eta guardia zibilak atxiki eta inkomunikaturik edukitzeko arrazoi bakarra.

Gure senide gazteak independentistak dira. Europa osoan eskubidea dena eta 1976tik aurrera eskubide zibil eta politikoen nazio batuen akordioan jasotzen diren eskubideak erabiltzea da beraiek atxilotzeko arrazoi bakarra. Izan ere, pentsamendu eta adierazpen askatasuna, asanbladak egiteko eskubidea eta parte hartze politikorako eskubidea Europa osoan ez bezala, hemen delitu dira  gazte independentistentzat.

Gure senide gazteak inkomunikatuta dauzkate. Ez dakigu non eta nola aurkitzen diren. Badakigu ordea, inkomunikazioa eta tortura sinonimoak izan ohi direla. Ez gara gu hori esaten dugun bakarrak, gure senideen egoerak bere biziko kezka eta ezinegona sortzen digun arren. NBE -ko giza eskubideen errelatoreek, Amnistia Internacional eta Torturaren Prebentziorako Komitea (CPT) dira besteak beste, Espainiako gobernuari inkomunikazioa bertan behera utz dezan eta torturaren praktika alboratu dezan behin eta berriro eskatu dioten ospe handiko erakundeak.

Honakoa azken 30 urteetan gazte mugimendu independentistaren aurka izan den erasorik handiena eta larriena dela uste dugu. Badakigu ez garela injustizia hau bizitzea tokatu zaigun lehenak. Soka luzea da independentziaren aldekoak diren gazteen aurkakoa. Modu masiboan eta arbitrarioan atxilotzen dituzte, azken gertaerek ezin argiago nabarmentzen dutenez: 34 atxiloturik, 40 atxilotzeko agindua eta 100 miaketa baino gehiago.

Euskal Herriko eragileei gogoeta dezaten dei egin nahi  genieke. Ez al dute gazteek beren ideien alde lan egiteko eskubiderik? Independentziarekin amesten duten gazteek ez al dute inolako aukerarik proiektu politiko eta sozial bat defendatzeko? Zein etorkizun da beren eskubideen alde eta amesten duten proiektu baten alde lan egite hutsagatik gazteak atxilotu eta espetxeratzen dituzten herri batek duena? Zein da Euskal Herriko gazte belaunaldiek duten etorkizuna?  Zein da Euskal Herriaren etorkizuna, oinarrizko eskubideak zangotrabaturik dituen gazteria batekin?

Euskal Herriko eragile eta pertsona guztiei, proiektu guztiak defendatzeko aukeraren alde eta eskubide guztien alde adierazteko deia egiten diegu. Horretarako, bat egin eta parte har dezaten larunbat honetan, arratsaldeko 17:00tan Bilboko Aita Donostiatik hasiko den manifestazioan.

Atxiloturiko gazte independentisten senide eta lagunak
2009ko azaroaren 25ean